大仙的足球與電影

呢張紅牌除咗摧毀呢場比賽，唔知道意義何在。

本篇文章用廣東話所寫，大仙覺得唯有如此，才能清楚表達對本場比賽的遺憾。

如有不便，敬請原諒。

凌晨場波，阿仙奴出唔到線有D可惜，但大致上都合乎預期，等待中嘅奇蹟，終究沒有出現。

巴塞強係人都知，去年以防守見長嘅國米，作客都要輸0：1，如果唔係主場靠火山灰幫忙，搞到巴塞要坐車兜一大圍至去到米蘭，都未必能成就三冠王。

講番呢場波，阿仙奴會輸係預咗，但雲佩斯（范佩西）復出俾人驚喜，加上中場有法比加斯（法布雷加斯）派牌，拿斯利（納斯里）同韋舒亞（威爾謝爾）都係到，後備席又坐咗替補殺手艾沙維（阿沙文），槍手都唔係完全冇機會晉級。

如果你有睇場波都知道，槍手中場都係俾巴塞壓住，打5個都冇用，成場波1次射門都冇，仲慘過打Winning，更慘嘅係施捷尼（斯澤斯尼）上半場19分鐘就傷咗，唔係話替補嘅艾蒙尼亞（阿穆尼亞）唔好，佢已經好出色，但係早早用咗個換人名額，搞到下半場需要換上進攻球員時，就只係得番兩個機會。

上半場守唔到0：0好可惜，不過美斯（梅西）嘅入球確係靚絕，冇野好講，除咗讚佢係天才，諗唔到第二個形容詞。

下半場一早追平睇嚟係好消息，但開心唔夠3分鐘，裁判一張莫名其妙嘅黃牌，然後兩黃一紅罰走雲佩斯，就真係睇到眼火爆，槍手D粉絲如果唔係怒火中燒，肯定都笑唔出。

呢張黃牌一D道理都冇，唔理雲佩斯解釋話全場有九萬幾人點聽到哨聲，裁判明知佢身上有張黃牌，硬係要用第二張黃牌嚟毀咗呢場比賽，大仙經常都有講，作為裁判，當然會有誤判，但無論如何，裁判要有一個立場就係，場上嘅勝負交俾球員，唔係用哨聲嚟決定。

呢張黃牌根本毫無必要，除咗主場優勢，或者其他默契，大仙實在諗唔到裁判一吹雞就衝過嚟俾黃牌係咩居心。

少打一人嘅阿仙奴結局係點相信大家當時都諗到，巴塞繼續強攻，入兩粒只係啱啱好，其實就算雲佩斯仲係場上，巴塞都有可能入多兩粒，但有樣野肯定唔同，就係當雲加（溫格）要換人時，斷估都唔會換走雲佩斯，所以終場前巴塞送禮，執行最後一擊嘅就好可能唔係賓特拿（本特納）而係雲佩斯。

成敗論英雄，輸就係輸，但輸係裁判手上，條氣梗係有D唔順，雲佩斯賽後形容裁判嘅判決係笑話（Joke），仲係用咗好多次Joke嚟形容，可想而知佢有幾嬲。

歐洲足聯賽後仲未收手，仲話要起訴雲加同拿斯利，話佢兩個賽後用咗不適當嘅語言批評裁判，睇嚟呢個笑話歐洲足聯肯定要撐到底。

雲加嘅調度其實亦唔夠好，大仙已經唔止一次講過，唔知點解雲加就係愛用賓特拿，佢明明冇料到，但上場嘅順位總係高過查馬克（沙馬克），賓特拿敗家就係人都知，俾十次八次機會佢可能先入到1球，如果下半場換入嘅係查馬克結局會唔會唔同？唔係馬後砲，但對於賓特拿早就死咗心，如果冇租走卡路士韋拿（貝拉），上呢名墨西哥小將點都好過佢。

睇完精華，各位有話都嚟講幾句吧。